遇見米米

『滲透作用』

2007-04-15T18:42:00.000+08:00

二零零七年四月十四日，進行野戰行動，地點係大欖田夫仔村，人數十六人。

朝早八時十五分旺角槍街集合上車，九點多就出發。事前都未肯定其實係去邊度玩個囉，架車到左荃灣，先開始知道自己要去邊度。係大欖郊野公園荃灣入，行左二十分鐘有多既車程，途中係咁過彎，左轉右轉，最後先到達目的地─田夫仔。

落車個陣，見到某d地方都係進行緊工程，相信係黎緊田夫仔都係有新既設置。田夫仔比我既感覺係好大自然，遠離市區。唔似其他野戰場地咁，冇左呢一份大自然既感覺，所以好舒服。亦因為遠離市區，所以連手提電話都接收唔到任何信號。但係地場既辦公室有一個固網電話。

準備好所有裝備之後，一行十數人就跟隨帶隊，去到第一個戰區。第一個戰區係以油筒為主要既掩護物既戰區。地型簡單並唔複雜，範圍亦唔係好大，一眼睇晒既場地。用黎熱下身都唔錯。係呢個場死左兩次，哈哈，都係自己大意企得太出，兩次都係中mask。

離開左第一個戰區，第二個戰區叫做風水林，戰區前面係一個祠堂，呢個係以叢林為主題既戰區，亦係我喜愛既戰區之一。因為我自己鍾意作為隊中滲透角色，滲透要求以少量人數，遠離主戰位置，到敵人既後方，再進行突襲。其實本來想成隊人集中火力，同敵人來個正砷交戰，當帶隊一開始吹雞，我先發覺自己未帶mask，嗱嗱聲上mask，上好mask個陣已經見到自己隊員走左好遠，雙方都打得火熱緊。見咁既情況，只好自己一個玩滲透─『獨行俠』。好順利已經兜後刑左敵人既後方，其實一路鬼鬼祟祟個陣，都不算聽住主戰位置既情況。聽到自己 teammate邊個已經死左，同埋都了解自己teammate都死得七七八八。當我兜到敵人七點位置距離廿米，比敵人其中一個女仔發現左行跡，亦向我開火，我只好搵掩護物，暫停前進。靜待左兩三分鐘。見冇子彈射去我呢邊。我先探頭望一望。個一個敵人已經唔係同一位置，個刻我諗左一陣，我應該繼續同一路線，定係再兜過另一邊呢。因為我擔心個一個敵人已經潛伏係另一個位置，錨住我。最後我決定都係照原定路線，一野就快步衝前去到斜坡邊，再往上到達敵人既六點位置。首先見到第一個向住背隻用單發開左五六槍，kill 左第一件。再向第二個，係一個女仔，錨住佢條腰又連開大約五六槍，又殺多件。當其時所有敵人都未知道有自己人係後方受到偷襲。當時我既感覺係『爽呀~』，殺左兩個之後。我又再暫停偷襲。過左一陣，我再search敵人，再殺多個。但係呢個女仔，死左都重要大叫『係後面呀』，即刻唔開心，打wargame死左係唔可以講野。佢咁樣一叫，已經唔好玩，比佢破壞左我既努力同計劃。最後當然連我都戰死左啦，當時敵人大約得返三個左右，而我方只係得返我一個人。但係，敵人當中有兩個都未知我係佢地後面，本想到佢地接近既距離先解決佢地，突然聽到槍聲，我就知道自己玩完，又係死係 sniper手上>.<。好唔抵，唔係個一個女仔多口，我諗個一場我可以一個人解決晒所有敵人。只係差少少咋。

之後個幾場都玩得好開心，同埋玩左d新既玩法。全日既 wargame 都好滿意，場地、環境、帶隊、善食、裝備、服務，都係可以比高分既。田夫仔呢個wargame 場，一個可以返轉頭再去既 wargame 場！

『二零零七年生日遊』

2007-01-10T22:39:00.000+08:00

在半夜時份，有幾個朋友已經急不及待咁同我講生日快樂，只係要係度再次多謝你/妳地。

早上十點正起身，整理一輪眼耳口鼻之後，預備出口門之際，媽咪比左利是一封，好 good！在場其他 uncle auntie 先知道今日係我大日子，唔怪之得請左假唔駛做啦，於是各人都急急搵利是封，一輪大個仔呀，幾時帶女朋友返黎見下呀，問去邊度慶祝呀，約左邊個好女仔呀，過後，就出門口，唔好阻住人地打麻雀。其實都幾煩。次次見親都講埋同一樣野。

十二點半有多到左金鐘，唔好意思軍曹大人，中環塞車，是日午餐 triple O，當 order 之前，軍曹問我有冇咩 special order，唔記得左唔要芝士，野食黎到，大鑊！成大件芝士有眼前，重要係未溶晒，重有四隻角係度，點算好。最後要同軍曹個 mushroom 交換，又唔好意思，下次我都係叫埋 mushroom 如果又一齊去食既話，可能下次 mos burger 見。換左個 mushroom 都係慣左，再加入茄醬，野味左不少，試一試吧軍曹大人。個 burger 真係好大個，成個 set 我都食唔晒，佢d french fried 真係好正，但係真係好 full 囉。唉呀～～下次要食晒佢！

食完野，陪同軍曹步行返公司，行左半條皇后大道東，之後一個人行左太原街幾間玩具店，搵到唔少 Q 版 gundam G-generation 既模型，而且價錢平，但係因為唔想拎既關係，所以冇買到，等我搵日放工去帶佢地返屋企先，佢地向我招手呀！行完太原街玩具店，就行去南華會續會呀，呢樣野好似已經成為我每一年生日都必做既事，搞到續會好似係我生日既傳統手續咁，哈哈！我記得上年幫我搞續會個位小姐，今年見到佢口帶口罩，唔通病病左，今年又係要麻煩佢幫我搞手續，唔該晒～～佢好好禮貌架，感覺上覺得佢幾好人品。希望佢快 d 病完。跟住上左去打左兩局，大件事，有d心散好低分。哈哈哈！

跟住出去百德新街 shopping，行左幾間發覺冇乜新鮮感，突然奇想坐車去尖沙咀，行左唔知幾多時間，都只係買左唔係好多野，而且對腳開始唔係好聽駛，但係都重係有 heart 去行街個喎，再跟手地一地龍過旺角，所以話，早知就咁算啦，頂唔順，上左一間網吧，上一上網之外，又可以飲杯野，坐坐抖一抖。

之後會合一個朋友去左食晚飯，去左奧海城食越南野，呢間都去過幾次，都 ok 既。食完飯送左佢去搭車之後，我都返屋企 lu。

好多謝咁多位朋友，我既生日慶祝活動重未完，今日先至係開始。多謝大家。

『香港人零七年第一份禮物』

2007-01-03T20:19:00.000+08:00

一月一日，新既一年，新氣氛、新事物、新景象。二零零七年第一個下午茶。心情冇乜唔同，簡簡單單打左個電話比住係附近既朋友，就出去食個下午茶。準時三點正出門口，冇遲啦今次。今次目的地就係電車路既『新釗記』，未去到已經腦海中不停咁出現好多好多雞亦薯條同埋凍檸茶多甜！行經西安里之時，遠見企左幾個人，一睇佢地多數都係為左一個唔知咩原因係度嘈交。當我行近經過呢個小人群既時間，聽到兩把人聲。係一男同一女。

女：『今一月一呀！你冇睇新聞架？』
男：『我都冇係度食煙，妳嘈我乜野呀而家』
女：『呢度唔食得煙架，你唔識字架』
男：『我行過見呢度有個垃圾筒，行入黎掉個煙頭之嘛。』

"this is the best time...."

我都係聽到同大約記得呢幾句說話，事件最後進展成點，我就唔知道喇。聽到個女人把聲，好惡死，好似想個男人死咁。可能佢本身食左好多好多好多二手煙，好多好多好多年啦，一生都同香煙有仇，但係，二零零七年一月一日開始，一班非吸煙人士終於羸得佢地既自由空氣。感覺世界美好左，希望返晒黎。

一班唔食煙既市民，係二零零七年一月一日之前，抖唔到氣；而家，大多數人都感到新一年真真正正歡欣，最好既聖誕禮物。食飯用餐既時候，唔需要再膽心隔離位有冇人吸煙。可以安安樂樂咁去享受豐富既美食。餐館上下亦唔需要因為分吸煙區同非吸煙區，大大減少好多人力，節省左好多運用上既問題同時間，令人流更有效率。

【警察查身份證】

2006-12-21T21:45:00.000+08:00

今日中午放飯，與同事一行七人去小肥羊打算飲茶，快步行先打算搵位，行到銅鑼灣一期落行人天橋，比兩名警察叫停查身份證。

p = 警察， m = 我

p:"先生麻煩拎一拎你身份證睇睇。"
p:"係銅鑼灣做乜？"
m:"返工，而家放飯。"
p:"做邊行呀?"
m:"i.t"
p:"下？"
m:"i.t~~~"

尾隨既其他同事見到都好突然，問咩事，行過就同我講我地行先搵位。基本上，兩個警察就咁問我拎身份證睇兩睇，又冇call總部，事但枝筆了兩了就比返我。我唔係第一次比警察查身份證，亦唔係話比佢check係好大件事，只係我覺得有好多地方，係好多時令我對警察既印象唔好。

以前同其他朋友都研究過，點解係街會比警察查身份證，有d人講笑就話樣衰，最後都係冇結果既，因為連身邊識既朋友警察，佢都答唔出，答既只係話，要查既時候咪比佢查囉。有好多人都覺得好樣衰，我都明白佢地係做野，我唔會怪人地要做正經事，有時我行過見到有人比人查證，望一望個人，染晒金毛，咬住枝煙，一睇個樣就係江湖人個咋，查呢種人我覺得好正常丫，但係有時見到有d著住西裝都比佢地查，有d好斯文樣。正正常常又比佢查，有次係中環見有兩個警察問一個 ol 查身份證，個 ol 眼都凸埋，同埋好唔順氣。重好大聲咁鬧個兩個警察。

有一次重怪，放工經摩理臣山泳池，前面有個金毛飛，我係佢後面行，行到出去大路，見到有兩個警察，竟然係問我拎身份證，個金毛就咁就行左去。我心諗唔係唔敢查金毛飛呀。由此事開始，我覺得呢班警察唔係因為樣貌去決定查唔查一個人。

有d朋友就話遇到警察，應該唔好同佢有眼神接觸，有d又話唔係，唔望佢，好似被開佢地眼神身有屎咁。我可以講，樣樣都死，有時個警察重鬼祟過我，我一路行都唔見有警察，個警察可以無啦啦係隔離行埋黎問我拎身份證。咁我一向行街都聽歌，真係比佢無啦啦嚇一嚇。都係好合作比佢睇下囉。

請大家比d意見！

【工展會，不停站不停站】

2006-12-13T23:12:00.000+08:00

【事件一】
是日晚上約左軍曹大人，時間大約六時三十分有多，本應想去廁界，中途軍曹打黎叫話差唔多到我公司樓下，先拎左送比我同二等兵既聖誕禮物，多謝多謝！先把去廁界一事暫時放低，嗱嗱聲落樓，又遇上地下廚櫃店的女店員。交收了後便返回公司，第一時間將二等兵的那一份比左佢，佢即時問：『喂！電呢？叫軍曹買埋電先得架』我既反應只有笑。

重新解釋一次，我唔係又去洗手間，第一次係去唔到要落樓拎野，第二次先係真！好趕好趕之下，又要落樓喇。聽日先去買電吧！聽日先玩直昇機吧！

再一次多謝軍曹既聖誕禮物！釘橋！釘橋！

【主題－工展會】
可能落雨既關係，工長會人流唔見得好熱鬧，從人口而論應該岩我去行一行，同有位置睇一睇野，但係，天雨路面必定濕滑，不太好。同埋，工展會既野其實唔太岩我囉，只係陪一陪軍曹去走一走，係入口處已經見到都驚，唔係掛，唔通要行一段之字路，好在唔係。行個段路，真搞鬼有兩男兩女，後生仔女，兩個兩個一排，速度何其之慢，十足係度扶靈咁，頂佢地唔順，唔好阻住晒啦，唔諗咁多，抽頭比油就去啦！入場近入口位置，都係幾間大公司既灘位，整到鬼咁大座野，各色其色，第一座野就係金至尊，我都唔係好明工展會又會有金買。都冇人睇，重衰過平時門市呀！

由左邊一排開始行啦，行左入去一條『湯街』，好多湯包同試飲，我冇試飲呀，聞到好多藥材咁既味，同埋好大陣菇味囉，平時媽咪個湯有落菇既，我都要摙住個鼻先夠膽去搞。嘩真係唔係好想企係度去試同睇清楚佢既湯囉，我直覺覺得試飲完會即『鐺』囉，軍曹唔知妳有冇覺得個陣我係一味向前行冇停過，哈哈～

離開左『湯街』，進入左世界知名既『上環海味街』，又係個陣味，唔得，唔停得，照去！

行左一段大直路，行左入去有熟食賣既地方，又係冇興趣停囉，我都唔明，個地下咁濕滑，點解重有人可以接受到係個度食野囉。行啦。唔想停呀，同埋要搵工展小姐既真身呀，點知一個都冇現身，真係失望。

寫到呢度，我都冇乜工展會既好野可以去寫，兩個懶人因為唔想拎野，所以一樣野都冇買到，唔知入場做乜，工展會，好多感覺囉，好似好大陸 feel，我諗我以後都唔會再去工展會，都冇乜野新鮮，新奇既野去睇，只係一個岩比人掃下日常用品既場地。唔知I.T.會唔會搞個類似既 function 呢？一定岩我！

【旺角死亡十字路口】

2006-12-04T01:46:00.000+08:00

【旺角死亡十字路口】，一字由朋友口中所聽，係電影『旺角黑夜』中形容一個世界知名，亦係人流複雜既地方之一。無論好人，壞人，男女老幼，都必然留下腳毛。死亡十字路口，又係旺角邊一度呢？

是日去左朋友度幫手畫 fashion design scretch，第一次既處男作，從未試過，不過有家計會既經驗，人體奧妙都畫過，都係 fashion design 姐，一於冇有怕，唻咪唻！不過一提既就係，主人家又遲到，十點正第一個電話叫佢起身，佢話比佢訓多半個鐘，好的冇問題；十點半打比佢，高叫 "起身呀～～"，好起左；十一點四十分，我已身在太子，打比佢位置在家中，唉！遲左落車，架巴士二話不說上左天橋直飛下一站美孚，只好由美孚步行返去荔枝角地龍站；在荔枝角度步．．度步．．．再度步；十二點四十分，電話到，在家中，先去開定位飲茶，荔枝角富臨，兩三個字後到冇問題；等下等下，一點四十分終於見到 winnie 了～～。食到兩點有多，去到場地，開工～～利是大吉！畫下畫下時間好快又過左，咁又九點幾喇收工個陣。搭小巴去旺角食晚飯，落車地點就係『死亡十字路口』。

朋友口中既死亡十字路口，正正就係豉油街與上海街交界，臨時熟食檔位置。點解朋友會話呢度係死亡十字路口呢？最初佢講既時候我都唔係好un，係小巴入面望出去街外，嘩～好有香港金像獎最佳電影得主『黑社會』感覺呀～落小巴既時候，佢叫我望下四圍幾多咩野企係條街度，我望幾望，留意到兩樣野。一，好多男人，相信係有背景既江湖兄弟；二，就係衣著極之暴露，低胸、吊帶、deep V、see through、迷你裙，唔駛多講都已經知道，呢一班女仔都係搵食既風塵女子。

其實，呢個十字路口我都係第一次行過，睇新聞旺角掃黃行動就成日都見到個度個臨時熟食檔，但係行街買野既都係另一邊波鞋街，最盡都係去到朗豪坊。而且知道旺角呢一邊可以話真係好雜，真係正常行街 shopping ，都唔會行到去呢邊，食野更加唔會揀到去呢邊，因為覺得呢邊唔乾淨。又 disco，又時鐘酒店，又麻雀館，又卡拉ｏｋ夜總會，又機鋪，冇樣岩，行去呢邊做乜丫。

當朋友問乜你唔知呢度係死亡十字路口咩？ Winnie, 講堅，我真係唔知喎！哈哈！正常人行街一定唔會行到去呢邊啦，咪耍我喇～話當時冇望到個d 女仔，係有望架，心入面第一時間覺得呢d 賣肉既女仔，唔知係慘定係唔慘囉。心入面有兩種感想，第一真係同情佢地，有頭髮邊個想咁丫？你估佢地好受架咩？上帝創造每一樣野都係好既，有能力既邊個想做佢地個一行呢？當時落小巴既時候，我望到一個女仔，長頭髮，面尖尖，身穿低胸衫，黑色皮外套，黑色皮短裙，手拎著手袋，面上化左妝，表面上風塵味道極重。見到佢面上牽強咁掛上笑容，定必在等候路過既目標，老實講，我有望到佢眼神，其實當時已經夜晚九點半有多，街頭都有幾陣涼風，身穿短裙既佢，心頭上只係諗，天氣涼了，還要在街頭等候生意，一個字『慘』。我會覺得佢好凍囉，為左生計，可能連食飯既時間都不理會。只在等了又等。

估計佢係唻自內地既雙程證女仔，一個人隻身唻到香港，人生路不熟，所有所有都只係聽從一班有背景既人士，去東就是東，去西就是西，行前便是前，回後便是後。一點自主權都冇，重要歷盡無數人既冷眼目光，受到外界無數既低賤既言語『雞』、『企街』．．．好多好多！那有人會理會佢地本身既故事呢？只知道佢地勾引佢地既老公男朋友！話佢地唔乾淨！話佢地唔潔身自愛！話佢地影衰晒其他女人！最後佢地都係要硬生生咁去繼續過住呢一種既生活。從個一個長頭髮女仔既笑容，感覺上，覺得佢係好牽強咁去扮出黎，會有人好想係涼風之夜中，等候客人咩？會有人唔想著回家，同屋企人一齊食個溫飽既晚飯咩？那會有人好似『金雞』入面既阿金咁，畢業後興奮咁跑到街上高叫 "我要做『雞』！"人地都係賣一樣野，提供服務，只係佢地呢一行係大部份人都覺得係低賤既行業，其實佢地都係付出自己既勞力，去搵兩餐姐，真係人地唔辛苦咩做一單生意，日日係咁做，諗起都想像到佢地有苦自己知。最多都係希望佢地定期去檢查身體吧。祝身體健康！生意興隆！

其實呢一班來自內地既女仔，真係拉黎拉去都拉唔晒，就算拉左，佢地都會再黎，就好似『未來戰士』咁－『I'll be back』。真係打不死！由有歷史開始，佢地呢種風塵女子已經存在左好多好多個世紀，點解佢地呢一行可以生存得咁悠久，而且重可以跟隨時代去轉變，加入唔同既原素，令呢一個行業更多采多姿。講真，一個行業可以發展得到，點都要有大量既需求，要不然有幾多 supply，冇 demand又點得呢？嫖客相信冇人會話係女人去嫖妓架啦，換而言之，咁多風塵女仔黎到香港，從事賣淫活動，ｄ女仔重要源源不絕咁黎，嘩！香港男仕有冇咁大需要呀？

一日都唔知要比幾多麻甩佬搞，做得呢行真係唔會講咩面子尊嚴，為既只係肉金。我係同情佢地多於睇小佢地，一買一賣嘛，何必要睇人地唔起呢？日日要同人上床喎，呢ｄ真係日做夜做，隨時一個唔好彩，遇到一個變態既，真係命都冇。新聞都有啦，風塵女子遇挾，被謀殺，一個弱質女流，要以賣肉為生外，亦要面對高風險。只好同天父祈禱，希望同機會都降臨係ｄ唔幸福既人身上。

我地已經係幸福既人。

【媽咪生日呀】

2006-11-28T22:49:00.000+08:00

Understand the things I say
Don't turn away from me
Cause I spent half my life out there
You wouldn't disagree
D'you see me, d'you see
Do you like me, do you like me standing there
D'you notice, d'you know
Do you see me, do you see me
Does anyone care

【事件一】

嘩！媽咪今日真係唔好意思呀！做左廿幾年兩母子，我竟然唔記得左今日係妳生日添，講起都好內疚。不過，好在有福星提醒我，唔係就已經約左朋友出街食飯。真係大頭蝦。不過係度再次祝妳生日快樂！青春常駐！身體健康！活力充沛！但係妳都要食野唔好再食咁咸，唔駛點咁多醬油架，夠味就得啦，自己知自己事呀！唔好要個仔勞氣呀！話又好話妳，唔話又太過份呀！希望妳知妳個仔心意啦！乖乖地喇！

Understand what I've become
It wasn't my design
And people everywhere think
Something better than I am
But I miss you, I miss
'cause I liked it, I liked it
When I was out there
D'you know this, d'you know
You did not find me, you did not find
Does anyone care

【事件二】

比利返黎喇！好多日公司唔見佢，朝氣不再，今日一見，仿似太陽出來了。好同事又見面，渡蜜月旅行終於回歸，期待以久的一天，哇哇哈！多謝你的手信呢～聽你講你今次蜜月之行，好似唔夠去曼谷咁豐富，有機會真係一齊去吧！二等兵。今朝收到你個短訊，真係失望，冇 giroro 枕頭，又聽妳講日本可以搵到既軍曹物品，竟然比香港少。噢～真奇怪，定係你去錯左地方呢？不過唔打緊，最重要都係你渡蜜月開心。手信既野都係其次吧！

【事件三】

今日食晏個陣，陪比利‧周去賣電話，我咁大個仔第一次感受係街頭買賣交易，企埋一邊睇住佢地交易，先問價，檢查機件，還價，議價，最後拍板！交易成功！恭喜恭喜！過程都好順利，只係唔係好慣企街囉．．．又比好多人望喎，但係個心都係想感受一下街頭交易姐，人地眼光都係一於少理佢啦～不過我企係度睇佢地交易，我又冇野做，又唔想走先，陪下佢啦，一個人交易，一陣比人搶左去冇人幫手點得呢？雖然我唔係好打得，但係多個人報警都好丫有咩事個陣。重記得，交易完個女人比左張卡片比利，上面印住『阿雲』，地址係銅鑼灣地鐵站出口，好鬼"浠"呀！

Unhappiness was when I was young
And we didn't give a damn
'cause we were raised
To see life as fun and take it if we can
My mother, my mother she hold me
Did she hold me, when I was out there
My father, my father, he liked me
Ol he liked me, does anyone care

【事件四】

此乃小事一則，每日返屋企都會行過一條斜路，今日除左見到一個外藉女人正在餵野食比街貓之外，見到一個阿叔，佢行斜路既方式真係與別不同，佢係『倒後行』既，一邊向後行之外，個頭重係拎後望，真係好似擺位咁款。真係幾搞笑。佢會唔會係退左休既司機呢？退左休都重好掛住自己退休前既工作呀？所以行路個陣，都不忘黎個擺位。

Does anyone care...

【修路工人集體馬路旁做晨操事件】

2006-11-24T10:00:00.000+08:00

每日都路經同一條路返工，原來都唔一定係日日如是的。事件已經唔係咩大鑊野，但覺得好奇怪。當今朝路經一個修路工程既時候，遠見有一班著住螢光外套，一行八個的修路工人，打橫排列整齊，好有隊形，開頭唔知佢地發生乜事。突然間！佢地一齊起手做早操，眼都凸埋囉。真係想像唔到修路工人都有呢家野，其中一個修路工人係印巴人，佢個樣勁無奈咁望住其他人一齊做晨操。旁邊重有一個我估係工程經理既人，拎住部相機影相。我都忍唔住笑左野。唉~~ 好搞野。

忙完過後

2006-11-20T17:06:00.000+08:00

【前言】

嘩～～呢期真係忙死，要幫同事整結婚影片．總算冇白費心機、精神、時間、心血係呢條總長度為四分鐘既影片。由構思、流程、構圖、動畫、效果、音樂、剪接、編輯都係我一手包辦。最後效果總算令自己滿意，但係都有好多好多野等待我去研究。

【事件一】
琴日，星期日下晝三點鐘，就係同事既大喜日子，娶老婆是也。原本打算 2:30 入到去啦，點知2:15 先係屋企出門口，重要係入元朗。小弟家住港島西區，要 45 分鐘內由屋企去到元朗信義會，真係好趕，可能遲到添。最後，我準時入到教堂，而且全公司最遲個一個人唔係我，有ｄ人 2:55pm 打比我話佢自己重係附近食緊野囉，太過份。我完全係合乎美國前總統－丘吉爾所講過既一番說話，『你早到，只係浪費緊自己既時間；你遲到，就係浪費緊我既時間；點解唔可以準時 on-time 呢？』哈哈哈～～

教會婚禮果然比係註冊處好，感覺多一份教會既關懷同愛係一對新人既婚姻關係之上。唱聖詩，何其好玩。加上聖經中既金句，簡直令人感動呀！當新郎講話之時，一對新人都忍唔住落淚，眼見平時高高大大既同事，當日竟然落下男兒眼淚，背後既一段故事真令人感慨。世界真係冇完美，神係點樣令自己完美呢．．．坐係前面既一個叔台，都喊左，之前重見佢大把野講，就連人地唱聖詩個陣佢都講野，竟然都喊左，重要低晒頭咁喊。其實，冇邊個新郎既親戚家人係唔喊架。米米，你的生活，好好好幸福呀～乖乖地喇～我已經好乖喇～不過可以發少ｄ脾氣呀～又唔係唔見左個包，唔駛噴火既～

【事件二】

以下內容含有成人用語，敬請家長留意。

琴晚去左尖沙咀同朋友食過晚飯之後，就坐車返屋企。970 係佐敦上車。不到一個站，原本我又係聽住 ipod 既，都冇留意發生左事，因為我向後望，冇留意車頭。只係坐坐下，點解架車咁遲都未開車，停左係車站架呢？望一望見到一個公公婆婆係車長個位同緊車長嘈，除低一邊聽下佢地嘈乜啦。

公－阿公，　婆－阿婆，　車－車長

公："你知唔知今日咩日子先！一年一度大日子，你同我收錢！"
車："我check下你地有冇長者證姐！"
婆："你要睇我咪比你睇囉"
公："ｘ你老ｘ，而家呃ｘ你呀，今朝坐個一程都已經比人呃左比左一次車錢。今朝已經唔順架喇條氣，無啦啦要我比錢。地鐵，九巴，都話唔駛比錢，你新巴做乜事今日要我比錢呀！"

一段時間，阿公阿婆都不斷爆粗，車長就忍唔住。

車："收聲下，唔係我唔開車！"
婆："超！唔好開囉，而家驚ｘ你呀，你條咸蝦ｘ"
公："打三條九囉，駛怕你呀，廖秀東冇交帶落咩下？今日咩日子呀，你真係唔知定係假唔知呀？"

車長都係個一句

車："嗱！好收聲下"
婆："超！收乜 x 野聲呀而家？今日長者日呀 x 洋，叫我收聲。打三條九丫，x 你老 x "
婆："叫我收聲，你屋企都有老架，叫我收聲，你日後都係好似阿婆咁架。"
公："話我呃你車錢，今日長者日呀細路，你老 x ，落到數碼港我就打 x 你條 x 街！"

由於太多粗口喇。多到我都記唔晒，只係知到成件事搞到3,4個字時間。車長又打電話返公司，其他乘客都開口令雙方和解，希望盡快開車，過多十分鐘，終於都開車了。我好覺得車長利用其他乘客既耐性做籌碼。唉....搞搞震呀！

『真』同『假』都已經唔識分

2006-10-13T21:09:00.000+08:00

今日中午放飯，約左舊同事一齊食，因為佢係灣仔邊返工，而已中午放飯遲返都冇問題。聽佢講佢而家公司，返十點放七點，中午食飯遲返去都冇問題。咩公司黎架，咁爽？而家工作環境又自由死，唔太多野做，又可以掛正牌打機，因為佢公司做 game，嘩～～爽爆呀～～！

佢話佢公司成日都有d玩家上去佢公司投訴，同埋要求賠償。例如話有一個人，上到佢公司話當佢玩隻 game 個陣，佢把刀攝左係舊石頭度，拎唔返出黎，何其搞笑。但係都係冇得賠，舊同事話因為冇人叫佢將手上把刀放係舊石頭上面。結果嘈完都係冇得賠。其實對於我地 i.t. 公司做野既人黎講，呢把 virtual 刀，只不過係一個 data，基本上同一粒塵冇分別。但係對於玩家黎講，呢把刀好緊要，因為佢地要真錢買。所以等於冇左一把真刀。跟住我話，不如去茶水間比把刀打發佢走好過啦。假如咁想要求賠償。

其實唔係好明白，而家d人價值觀好似改變晒。可能我冇玩呢隻 game 啦。但係，講到底都係一個 game，其實我以前都有打機架。都有玩 online game─starcraft、aoe。但係，都冇話好似呢類玩online game 既人咁，玩到唔見左把刀都去投訴同要賠償。以前打機，冇晒 data 同 save。一係唔再玩隻 game, 一係就由頭玩過。但係呢d online game，冇左個 data，就可以有機會去投訴。其實我而家都 blog 到有d亂，諗落係有分別既，但係其實都係打機姐，何解會發展到一隻 game，會引起呢d笑料既出現呢？係邊個既問題呢？

呢d online game 係好成功架，將現實一個人帶到去虛擬世界，呢d人都真係沉醉左去呢一個虛擬世界入面。以前打機，目的只有一個，就係要打爆機。呢d online game，冇打爆機呢回事。真真正正係同現實世界條 timeline 一齊前進既另一個空間既 timeline。唔同玩家有唔同既虛擬故事，係呢個世界之中。

可能有d玩家已經完全沉淪左去呢條虛擬 timeline 之中，未必抽離得到呢條 timeline。返唔到去真實世界。咁樣其實可唔可以去報警，話我唔見左個仔，唔見左個男朋友，唔見左個老公(我只係假設玩online game男比女多)。報警話我個仔去左另一個空間呀。

聽住『紅綠燈』過斑馬線

2006-10-12T22:43:00.000+08:00

如果有聽過鄭融個首『紅綠燈』既話，都應該知道首歌開頭係點。其實成首歌都冇問題架，我想講既就只係首歌既開始，真係唔知用危險定係白痴去形容個一刻既反應同感覺，都可以用『杯弓蛇影』、『草木皆兵』黎形容既。

從小老師也加倍認真　來教導我步過紅綠燈
右與左　必須清楚看真
那管一次做錯　也都可摧毁這生
何解我戀愛雙倍殘忍　從來是快樂過便不會僥倖
動作小簡單偏偏最深
我怎可以做個　最優秀路上行人

話說首歌開始係由閃緊既綠燈提示響聲轉紅燈既提示響聲『du.du.du.得....得....得....得...』，咁我習慣左係條街行緊個陣，聽住歌，邊行邊歌。今朝返工落車咁經過一條斑馬線，咁岩個陣紅燈既，個一刻都未聽到『紅綠燈』。重係聽緊『because of you』，未段鬼咁澎湃架嘛。咁下一首就係『紅綠燈』啦，個一刻咁岩又由紅燈轉綠燈，咁睇到綠燈我就緊係過斑馬線啦，但係我又聽到係紅燈提示響聲喎，個一刻個人已經比油去啦，又聽到『得....得....得....』。個下人類自然求生反應係急停同後流囉。流後左一步先醒起自己聽緊鄭融『紅綠燈』....囉！

誰想到走錯死裡逃生　才明白較沒有夢想更不幸
若誕生　不好好開過心
也不可以被愛　我不過是像泥塵

明明係綠燈，又點會係紅燈既反應？個下真係抽筋咁囉。反應係即刻流後挽回自身囉，假若要衝燈又怎會唔損傷唔留痕？總之今朝真係比個咁既行為，真係要自問『你做咩呀～～？』

但係比我發現到一樣野，大家都可以留意一下自己，過紅綠燈個陣，係因為睇到轉燈先過斑馬線，定係因為聽到聲先過斑馬線呢？我行路通常對眼係向下三路望既，好少望上三路。點解，因為習慣左，因為屋企附近太多狗屎黑點，冷不防真係踩左狗屎都未知。所以多數都係對眼係望住下三路。變左好多時都係聽聲多，但係自己又聽住歌行路，哈哈～～都係要小心d先～～

明明綠燈　轉眼變成紅燈
假使相當勇敢　怎可挽回自身
若要衝　損傷怎可以不留痕
來又去　要找的際遇未接近
明明綠燈　轉眼變成紅燈
抬頭前望去　對面馬路如此吸引
逐秒等　心急總加倍的難行
如夜了　我衣衫太薄便歸家
靠路燈......

reject 名單

2006-10-11T21:41:00.000+08:00

而家岩岩聽到 Kelly Jackie - 『Princess Diary』

雖說幸運半生　愛念仍難靠運
那一吻　如自困　慨嘆一切是愚笨
一再夜夜去等　卻亦無從靠近
看魔鏡　沒指引　錯愛毫無疑問

是日同事們一行五人去左間日本野食拉麵，明明出個陣得四個人─亨利、比利、俄吉斯丁同埋我，突然間身後多左一個人，嘩～～～～！積琪唔知幾時同埋唔知邊度鑽左出黎。就好似今日 blog 既主角─『曱甴』。事原係正當我地五個人食緊拉麵個陣，坐係對面既享利突然『嘩！』左一野。當時我重未知咩事，佢話有曱甴而家唔知爬左去邊，根據形容，隻曱甴都唔細隻下。但係佢地個邊卡位重係覺得好不安，就要求換位。最後都重係換左另一個位比我地。一個午餐總算咁就度過左。

其實出去食野既地方，想冇曱甴都好難。曱甴都要食野既，除非真係一ｄ好貴好高級既地方，佢地做到十足衛生，否則，有都唔奇。只要唔係係我份野食安全範圍內，同埋食完唔駛去睇醫生，已經叫做可以接受。不過今日我都冇親眼見到隻曱甴，真係唔知可以比咩批評好。其實呢間野都有一個唔係咁好既印象，一黎野食唔係真係咁好食，價錢又唔係特別抵食，只係日日放飯都諗唔到食乜野，先跟大隊去。上次去呢度食，甜品上面有一條毛，而第一眼睇到條毛，從佢外表、長度黎睇，令我覺得係由個度黎。

呢一間野，已經被列入 reject 名單之中。

聽到舊日愛歌　盼望仍能唱和
你怎會　懷念我　致我苦痛亦無助
走到絕望處境　怪你亦沒反應
真愛找不到見證　滿佈迷霧　未看清

其實好多間都已經係 reject 名單之中，reject原因好多。比人呃，唔好食，態度差，串串貢，唔乾淨，唔抵食，好大煙，要等位。真係理由多多。最終換黎既就係冇啖好食。其實一個 lunch 事但食d野，早d返去黎個午睡，何其爽死。lunch 都唔係好緊要既一餐。我都幾鍾意燕萍度食越南野。又唔太飽死，又唔會太少野食。份量真係岩岩好對於我黎講。潮苑唔係唔好，只係太迫個環境同埋要等位，又漏水。唉......都係想搵d野食下姐，點解都咁困難架？！

縱是遺留著痛哀　都要將一生中心愛
記在腦海　冀盼來日　亦會相愛

靈感到前既『吉』日

2006-10-10T21:13:00.000+08:00

寫 blog 既時候，岩岩聽緊徐若瑄、曹格 -『i still believe』

徐：謝下美麗的外殼　透明的我們還剩下什麼？
　　愛情就像水晶球　堅固而脆弱
曹：一個人也許自由　兩個人的感動大過天空
　　喜怒哀樂共同擁有　不讓遺憾留

放工一刻，就開始諗今日 blog 乜野好呢？寫 blog 都係要記錄個人每一日所見所聞。發生係身上既特別事，又係聽住 ipod nano。歌就一首一首咁去，諗下諗下，今日真係冇咩勁料好爆。只係上晝返工坐地鐵去到金鐘站，讓左個位比個阿公，同埋叫坐我隔離個西裝人起身，讓個位比阿婆，因為人地兩公婆一齊，我自己點讓都係得一個位，只好向身邊個西裝人埋手。總算順利將阿公阿婆安定左。落車個陣，個阿公都向我點點下頭，我都向佢示一示意，就落車。

是日係公司，都好平平淡淡咁過左。生活會唔會有d過份沉悶呢？會唔會欠缺左色彩呢？日日都係咁過，唔通將來每一日都係咁過？我重好後生，真係要咁安定又一日，我好覺得自己而家既每一日都好有規律。朝早一定係返工，夜晚一定係返屋企。唔似其他人咁，日日都去五光十色。如果我日日都係咁，我每一日既 blog 又點樣去寫呢？

寫下寫下都咁多個字啦。我重擔心自己一段都寫唔到？

曹：感覺寒冷時候　我抱你在我胸口
合：當你淚流的時候　我在這裡不走(我在這裡不走)No～
徐：愛散發的溫柔　在此刻用心感受 Oh～
　　我想和你一起　讓幸福轉動

生活，每一日都係『吉』日，何謂『吉』呢？『吉』即係『好』，米米每一日都係好日子，有人話米米生活好悶，比係佢早就悶死左。咁點解米米會覺得係『吉』呢？吉又係空既意思，日子都認同係有d悶，但係悶唔見得一定唔好，只係做既野係要坐定定，做左同未做都好難有人發現得到，但係安定咁過，唔係好咩？一個人既生活，係吉唔係吉，要睇下個人價值去到邊，人人都唔同。有人總覺得放工係要去玩下，我唔覺得玩完個人會放鬆左。有時都會諗下點樣去改變自己既生活模式，令自己生活環境唔同，咁樣可能令自己成長。要點樣改，重諗緊。係諗既時候，都不段咁去充實自己，等緊既都只係靈感到。

徐：Baby～ I still believe　愛可以走過亂流
　　緊緊握住雙手一秒　就夠不孤單寂寞
曹：Baby～ I still believe　(Baby~I Still believe～) 愛要有夢才會快樂
　　就算未來的路不同　你在我心中到永久

專線小巴新服務？

2006-10-09T22:23:00.000+08:00

今日一如以向平平安安又過左一日既時間，都諗住冇咩特別、新奇、爆笑事情係自己身邊出現啦。呀!? 咁都執返個尾彩，就係坐車返屋企途中，發生一件其實好小事，都唔係好同我有關係既事，只係覺得......係真唔係喎~ 事情就係咁既......

我一向坐車都有個習慣，就聽歌。同平時一樣，一放工走出公司門口，就已經聽緊ipod nano，好正常上車，坐係後排單邊位。架車正想係總站比油去個下，突然急停！望一望咩事呀？原來有個中學生拎住一件樂器想上車，咁佢上左車啦，都係好正常架車都係咁比油去啦，係咁去係咁去，中途d人係咁上係咁落，其實真係冇乜特別囉，但係我唔係耍緊妳/你地架，未講到咁解姐。架車去到堅道聖心商科門口，亦係我聽歌聽到劉浩龍同謝安琪合唱既 - 『滄海遺珠』

劉：如滄海深處　埋藏著遺珠
謝：其實你好處　個個也不知
　　唯獨我先可以　明白上帝構思
劉：於沙礫裡
合：找到　璀璨珍珠

突然聽到有人叫喎？！當時我都未知叫聲何來呀！於是我除低一邊ear phone，四圍探頭，睇下邊個人阻住我聽『滄海遺珠』。

叫囂人：「呢度邊黎架？」
司機：「呢度堅道架！」
叫囂人：「唉呀~~我訓鬼著架呀~~唉~~」
司機：「你想去呀？」
叫囂人：「我要去堅尼地道呀！！！」(點解我要用三個感嘆號呢？因為個人語氣係發緊脾氣)
司機：「出聲先得架，鬼知你要去堅尼地道咩。」

謝：你是誰你是誰
劉：可有地方發亮
合：旁人忙著誇獎色相
劉：沒有空管妳的修養
合：唯獨我　留下拍掌

於是司機就門車比叫囂人落車，個人落車我先知道，原來又係你呢個肥仔，上車同落車都咁突然，阻住我聽歌個mood。但係諗諗下司機最後個句話「出聲先得架」，係唔係即係坐專線小巴有新服務提供，就係預早叫人起身記得落車呢？

劉：人家冤枉妳　平凡悶孩子
　　但是妳心事　我不信
合：無聊沒意思
劉：就算誰都不欣賞
謝：但偏偏
合：我可以～～～～

中秋 seminar 後記

2006-10-08T18:57:00.000+08:00

一連兩日既中秋節研討會，由『日本東京字體指導協會』聯同『Hong Kong Amazing Angle Design Consultants Limited』合辨，由『香港創新科技署』主要贊助，Tokyo Type Directors Club Exhibition in Hong Kong 2006，當中都有 exhibition。非常開心可以一聽幾位設計界、排版業既大師級講野。

【第一場seminar】
sorry！sorry！我遲到左，miss 左佢地opening，唔打緊，因為第一位 lecturer 係 10:30am 先開始，我去到個陣都只係 10:20am around。第一位 lecturer 叫 les suen，好後生既設計師，出土於香港，全程戴住 cap 帽，個鴨咀摺得起晒角，老實講佢個樣真係睇唔係好到，說話語氣同好多年青一代 designer 一樣，帶有幾分串串貢既味道，玩個性，要有格，佢講過咩說話唔係好記得，印象亦唔太深刻，我見識少，未聽過佢大名，唔清楚佢做過咩大作。可能睇過佢既大作，只係我一向都唔會理會邊個人做。

第二位 lecturer，祖父江慎，第一刻比我既感覺係『許冠英』，笑容滿面，風趣，帶有好多分慈祥老師既感覺，聽佢一個鐘既演說，幾 relax 下。同第一個風格差好遠好遠，果然薑是老的辣。亦可能日本人就係咁。又可能佢搞好多漫畫既排版同設計，個人都幾大細路。

放飯時間，一個行左去金馬倫道個邊食越南野，奶野啦香港今個黃金週，星期六中午12:30尖沙咀街頭靜到丫，我重以為係早上八九點呀！問你怕未？食完野，行一陣街，入左去 5cm，成間野都係得我一個人咋，幾 vip feel。未試過可以係香港 shopping 係咁有空間感架！重少人過平時放工去行街個下。唔係少人，而係冇人。

第三位 lecturer，算吧啦，真係悶到『乖乖』，悶都唔打緊，get 唔係好到佢個 main point，可能我係 web designer 啦，output、排版真係唔多知佢想講咩。但係佢又講下佢公司做過既 logo design。

【第二場 seminar】
我由第二位開始講起啦，因為原因有兩個，第一係我又遲到左，第二又係悶野。第二位係兩個來自英國既老外，幾好喎佢地presentation，熄晒燈，放music，播powerpoint，完全可以又係睇唔清楚兩位大師既樣貌，但係從佢講野把聲，唔知佢係好緊張定係把聲係咁架呢。震震地把聲，搞乜？但係佢地放左好多music，而呢d music 係佢地做既 cd cover design 既 cd 入面既 music‧都算係咁，有野睇有野聽，多媒體囉。起碼唔會訓先啦。成功架！

又係時候放飯，今日行左去佐敦個邊食，冇咩特別就過左，條街算係有返多d人，琴日真係可以嚇親曾蔭權。

真係好戲總在後頭既，中午過後呢兩位設計大師，亦係大會今次 seminar 最後兩位要演講既大師。唔係話之前個d唔好，而係留係在場既聽眾既印象一定深刻過之前，呢兩位大師分別係山田英二與及淺葉克己。佢地 demo 既作品，睇個一下感覺係正到感覺到個靈魂好似離開左自己咁。令人有靈光一閃既感覺。我發覺到一樣野，一d上左年齡既日本設計師原來好鍾意著d好花既衫架，顏色又 sharp，祖父江慎、山田英二同埋淺葉克己三位大師都係呀！相反，年青一代既 les suen 一連兩日既衣著都係好簡約。